Carpon Bahasa Sunda "THR"

PUASA geus nincak tanggal wewelasan. Geus waktuna mayar THR ka para karyawan. Hal pikasieuneun keur kuring salaku Dirut PT Jibrut da apan pausahaan teh wajib mere THR ka karyawanna. Lain teu inget kuring ge, ngan hoream. Nya lahlahan neangan akal sangkan kuring teu ngaluarkeun THR. Na hiji poe, sakabeh karyawan ku kuring dikumpulkeun. Maksud teh rek sasadu yen Lebaran taun ieu mah pausahaan moal bisa mere THR.
Derekdek kuring biantara dina basa peleya-peleye bari teu weleh nyerengeh, teu cara sasari mun karyawan boga kasalahan estu sangar bari sesengor.
 “Berhubung perusahaan kita lagi lesu karena seperti sodarah-sodarah ketahui harga bahan baku nerekel sajah. Berhubung harga BBM naik terus-terusan. Berhubung perusahaan tidak untung sampai-sampai sayah sebagai direktur harus udud ngolomoh kuntung. Maka, dengan berat hati, berat tangan, dan berat kaki, pada tahun ini perusahaan tidak akan memberikan THR!” cekeng teh to the point kana pamaksudan.
“Huuuuuhh….!” Saur manuk.
“Maap ya, sodarah-sodarah. Maksud kami menebar THR, apa daya hanya mampu ejegeler!” cekeng teh hayang leuwih tandes.
Jep jempling lir bancet katincak. Ngan teu kungsi lila katangen riuk beungeut para karyawan teh barobah, tina kiruh jadi bear marahmay.
“Jadi, sodarah-sodarah setuju dengan keputusan perusahaan?” tanya teh  geus ngajudi nu matak bubudenna marahmay ge maranehna nyatujuan kana kaputusan kuring, enya moal mere THR tea.
“Setujuuuuu…..!” ragem. Malah aya nu ngembohan, “Setujunya juga  pisaaaaan…….!”
Puguh we kuring atoh. Di mana teuing aya karyawan nu sakitu solehna model karyawan di pausahaan kuring. Sok padahal kuring nyarita moal mere THR teh ukur papaehan da ceuk tadi ge akal-akalan. Ari niat jeung boga rarasaan ka karyawan nu geus gede jasana ka pausahaan mah duit teh aya, rek meunang kitu kieu oge da duit mah tara kongkorongok apan. Heueuh da duit teh hayam jago.
“Terima kasih, terima kasih. Semoga tahun depan perusahaan kita meraup laba besar sehingga sodarah-sodarah mendapat THR. Oleh karena itu, saya harap sodarah-sodarah harus bekerja lebih keras lagi!” cekeng bari maledogkeun imut. Ti mana we milik mah, jero hate.
“Silakan siapa yang mau menanggapi!” pok teh ngarep-ngarep aya karyawan nu rek mulang tarima kana kahadean kuring nu geus transparan alias brukbrak. Jung aya nu nangtung, laju ngomong.
“Saya sebagai wakil dari teman-teman karyawan PT Jibrut yang Bapak pimpin, izinkanlah barang sejenak saya akan kokotak,” reg heula nyelang ngarenghap. Batur-baturna kaleprok. Pok deui nyarita, “Berhubung Lebaran tidak bisa diundur da bukan undur-undur juga tak bisa dimajukan, apalagi dibatalken. Berhubung banyak yang berjualan segala-gala untuk keperluan Lebaran. Berhubung kami punya anak, istri/suami. Berhubung kami punya orangtua dan mertua, bibi, uwa, kakek, nenek, alo, suan dsb. Berhubung kami punya udik sehingga kami perlu mudik. Maka, dengan senang hati kami memutuskan untuk bersedia tidak menerima THR!” Ger batur-baturna kaleprok mani handaruan.
Kuring ngahuleng sajongjongan, ngalenyepan omonganana nu asa matak baliwet. Kuma teu rek kitu, ongkoh berhubung itu berhubung ini nu nandakeun merelukeun hiji perkara, ari tungtungna bet teu merelukeun nu diperelukeunana. Matak baliwet lin ari kitu? Bisi pajarkeun kuring odob, piraku atuh nya direktur odob mah, kuring rikat ngagorowok.
“Bagus, bagus, sodarah-sodarah adalah karyawan soleh yang layak masuk rekor Muri,” pok teh bari ngacung-ngacung dua jempol leungeun, tadina mah rek jeung jempol suku diacungkeun duanana. Ana celengkeung wawakil karyawan nu tadi biantara ngomong deui.
“Ya, kami tidak memaksa perusahaan memberikan THR kepada kami karena memang kami tidak butuh THR untuk menghadapi Lebaran, sing sumpah.Yang kami butuhkan untuk Lebaran, cumaaa…uang, duit, fulus, artos, alias cicis. Lain tidak. Jadi, kesimpulannya, biarlah tak diberi THR, tapi Bapak wajib memberi kami duit, mau rupiah, ringgit, dollar atau euro, tak jadi soal. Kalau tidak, jangan menyesal kalau Bapak menjadi korban Si Ryan, jagal multilasi dari Jombang, berikutnya. Titik!”
Tetempoan ranyay. Bru, ngajurahroh.*** (Parantos dimuat dina Majalah MANGLE No. 2187 edisi 18 September 2008


Ku: Fendy Sy. Citrawarga    
tugas Bahasa Sunda
Moch Rizqi Hijriah 
IX A SMP AL HADI Bandung
Guru: Pak Soni

About the author

Admin
Donec non enim in turpis pulvinar facilisis. Ut felis. Praesent dapibus, neque id cursus faucibus. Aenean fermentum, eget tincidunt.

0 komentar:

Template by Clairvo Yance
Copyright © 2012 Rizki Hijriah and Blogger Themes.